紅VAN開到去美國　或開續集止渴？

本土紅VAN穿州過省踩入美國！當美國傳媒關注政界猛人陳方安生同李柱銘嘅外訪行，原來連香港嘅導演陳果亦好受重視，《華爾街日報》為咗電影《那夜凌晨，我坐上了旺角開往大埔的紅VAN》專訪陳果，仲以「香港現代啟示錄」（Apocalypse Now in Hong Kong）為題，訴說香港𠵱家問題多多。

[img]http://static.apple.nextmedia.com/images/apple-photos/apple/20140411/large/11lp2p1.jpg[/img]
■連《華爾街日報》都有留意《紅VAN》，港產片好架勢呀！


被譽為「香港現代啟示錄」
改編自高登人氣網絡小說嘅《紅VAN》，噚日正式喺香港上映。呢套由陳果拍嘅電影因為隱喻多、未上畫已經好受注目，估唔到呢齣講述香港一夜間變異，留下紅VAN上17人圍城自救又各懷鬼胎嘅本土戲，連美國都關注，喺噚日開映同日，《華爾街日報》刊登陳果專訪「造勢」。
呢篇題為「香港現代啟示錄」嘅訪問文章，指出香港過去發生好多社會問題，例如內地自由行襲港；內地熱錢流入令樓價飆升，加深中港兩地衝突；亦提及回歸17年嚟嘅動盪，例如身份認同及北京干預香港自治等問題。陳果喺訪問中話呀，佢喺《紅VAN》中想帶出嘅，正正係香港𠵱家面對緊嘅問題，仲話會同製片商計劃拍續集，唔知呢架紅VAN，下一站會去邊？


來源:蘋果日報網站