新娘：人情不能少過$600　網民：勁cheap

[img]http://static.apple.nextmedia.com/images/apple-photos/video/20150305/org/1425499353_1d2f.jpg[/img]

近日網絡流傳一位準新娘畀婚宴賓客嘅短訊溫馨提示，詳細列明「2015年人情公價係$600」，呼籲親友「避免少於公價」。收到短訊嘅網友話同新娘其實唔熟，但新娘講明係分開兩張請帖畀網民同佢女友，所以人情要「雙份」。網上鬧爆新娘勁cheap。
公司議論紛紛，因同事黃老闆快將小登科。大家話賓客都應該整番篇「擺酒溫馨提示」。明明姐劈頭話，「唔該準時開席，餓到肚痛，成十一點幾先走得！」女版成龍就「好心」提醒新人唔好嘥時間諗回禮禮物，「送個有你哋兩個樣嘅公仔畀我，唔知點處理」。咁又係，萬一唔小心整爛就大吉利是。佢哋又話張帖唔使夾埋新人2R結婚照，散席時都唔使送上相片，「上網睇得㗎喇，環保吖嘛」。真係環保咁偉大？費清好懷疑囉。

#酒樓公價六百元
婚禮顧問歐惠芳話，酒樓人情最新公價六百元，酒店八百元，但佢話人情係視乎交情；收到喜帖唔出席一般都會畀三百至五百元。不過如果不幸收到新人咁無禮嘅溫馨提示，佢話如果其實同新人唔熟大可以「人唔到禮唔到」。
大家討論得興高采烈，做開調查新聞嘅黃老闆，行事一向神神秘秘，只係似懂非懂咁笑咗一笑。其實大家都係講笑箒，去飲係贈興唔係交易，唔使明買明賣嘅。

[img]http://static.apple.nextmedia.com/images/apple-photos/apple/20150305/large/05ls4p8.jpg[/img]


來源:[url]http://hk.apple.nextmedia.com/news/art/20150305/19064126[/url]