■旋轉式轉檔鈕操控非常 Hi Tech。

歐洲建築愛保留傳統模樣，認為咁樣先至夠 Grand，如果換上係車，齋得傳統味，咁不如坐馬車！想貪心啲，如果可以保留傳統優雅，同時又帶有意想不到的科技驚喜，咁先至係將豪華品味再提升，英國傳統品牌積架 XF喺呢方面落足工夫，似乎話晒俾大家知，佢都做得到。

猶如置身大梳化
Grand唔係淨係用錢可以衡量，好視乎個人係咪懂得欣賞，穿金戴銀唔見得 Grand得起，只會換來暴發戶之稱。喺車界中 Grand得有品味的，點會漏咗積架！英式典雅設計已經討盡人心，自從新一代 XF的出現，帶來另一種豪華感， XF Luxury Special Edition版更大耍「牛皮氣」，令任何人置身其中，就被這「牛氣冲天」之勢所包圍。事關英式傳統工藝點會令人失望？新版除了全車座椅甚至門板用上頂級真皮皮料製造，在環艙式中控台上，用上真皮鋪設，令身處車廂，猶如睡在真皮大梳化一樣舒適，由高級木料與金屬味飾面相襯，視覺效果強烈。





淺木料更 Young
如果豪華單單只着重視覺，似乎過於膚淺，意想不到的驚喜才是豪之所在。 XF車廂設計盡玩高科技 Gimmick，為視覺、聽覺，甚至觸覺帶來全面享受。車廂木料飾面唔係傳統的深色桃木，而係 Young味較濃的淺色木料。咁都未夠驚喜？咁就要先行撻着車，應該係㩒着架車至真，因為 XF用上 Keyless無匙系統，㩒個掣，旋轉式轉檔鈕（ JaguarDrive Selector），即駕駛席旁的中控台波檔旋鈕就會自動升起，再按冷氣按鍵，冷氣金屬送風口會自動翻開，非常 Hi Tech，一剎那還以為自己正操控 Transformer。




■車頭鋪上真皮，同級中獨有。

狂野動力爆發
這款 XF Luxury Special Edition版除內櫳，外表都有唔少搶眼之處，換上重新配置的七輻式合金輪圈，加上車尾微微上翹的鴨尾翼，低調得來夠晒典雅。它配上 3公升 V6引擎，當轉數達 6,800轉時，可輸出 238匹馬力。至於扭力，轉數達 4,100轉時，更可輸出最大扭力 293Nm， 0-100km/h只需 8.3秒，最高時速則鎖定為 237km/h，絕對能體驗野豹發惡的威力。


■換上七輻式合金輪圈更搶眼。


■車尾微翹鴨尾翼夠內歛。


■隱藏式金屬送風口，開車時會自動開啟。


■木紋與金屬混合的中控台，視覺效果強烈。

皮椅只用公牛皮


積架作為英國傳統品牌，一直堅持貴族式品味，出名用料嚴格，除了其狂野性能，真皮座椅也絕不簡單。原來積架車系的皮料全是牛皮，更特定是公牛皮，公牛皮做出來的質料會比雌牛更柔軟順滑。不過除質料，皮料顏色亦夠晒多，好彩代理夠細心，喺陳列室內就有大型屏幕俾車主自選車身及車櫳皮料顏色，即時同你襯番晒出嚟，就算睇唔到現貨，都可以睇到效果。


a.陳列室內可即時挑選皮料顏色並透過屏幕睇到真實效果。


b.高級皮料及縫製技巧，長時間使用都不會有皺摺情況。

XF Luxury Special Edition

引擎： 3公升 V6
馬力： 238bhp/6,800rpm
扭力： 293Nm/4,100rpm
傳動： 6速+/-半自動波後驅
售價：$538,000
[節錄...]

來源:蘋果日報網站