■只有 7公斤車重的 CFXX，女生一樣可以單手托起。

高級品味生活的世界，男士所好又豈止幾百萬車價的超跑，高品質單車已成為新目標。數萬元一部單車已是身份象徵？未算！ Colnago跟 Ferrari攜手打造的 CFXX限量單車，售價高達 12,500歐元，約 13萬港元。 CFXX雖無拉利的極速，但地位肯定就如拉利馬仔般一躍龍門。

全球限量 50台

■全黑車身黃色字，經典意大利結合的冷酷藝術品。

13萬元呢個數目可能好多人都負擔得起，但要用來買一部單車，就未必人人捨得。車主係法拉利迷亦係單車迷，一見到法拉利官方網頁公佈推出全球限量 50架 Ferrari CFXX單車，二話不說決定買來用作收藏，佢覺得呢個價錢一啲都唔貴，「平日買架單車返嚟左改右改都分分鐘過十萬蚊，以 CFXX所跟嘅配備嚟計，的確抵玩！」咁又係，仲要有埋法拉利個馬仔嘜頭，感覺又抵啲，加埋全球限量 50架的矜貴程度，感覺更加抵！

全碳纖打造 7公斤車重
XX於法拉利車系中向來代表專為賽道而設計的最尖端技術，由 Colnago跟 Ferrari攜手打造的限量單車，名字亦加上 XX，因 3PRS車架線條設計及全碳纖物料打造的理念，亦借鑑了 F1賽車的技術和精神。除車架，連頭叉及座椅等配件均以碳纖物料製造，配合 Fulcrum刀軨，全車只重 7公斤，唔只睇得，有碳纖、有刀軨、有電子轉波，一樣踩得，貫徹法拉利的速度精神。


用電轉波夠巴閉


呢部 CFXX最巴閉地方，首推 Dura-Ace Di2電子變速器，靠電轉波，有別普通單車須靠威吔扯動轉波，輕輕一按便可轉波，容易輕鬆得多，反應亦更敏銳，連車主都話係最吸引的地方。

訂車提供體重及鞋尺碼

■手柄位置有兩個轉波按鈕。

訂購 CFXX時，廠方亦要求車主提供自己體重及鞋尺碼，為你度身訂做適合你的單車尺碼，細心尊貴服務所帶來的虛榮感，確實有時要用錢先可以買得到。


■極幼身的碳纖座椅令人不敢亂坐。


■專業單車的腳踏須配合特製單車鞋踩。


■單車附送個白色 Colnago水壺。


■碳纖頭叉連 Fulcrum破風軨是豪之配備。


■ Colnago C-HS1手柄印上 for Ferrari字樣。


■電子變速器每次充電後可以行 1,500公里。

貴價配件越趨講究
以為單車玩意只有 Ferrari CFXX先貴得出奇，咁就錯喇！其實高品質單車甚至單車配件都越趨講究，質量及設計越趨完美，索價便越驚人。別以為呢啲貴價單車有價無市，追求高享受男士近年瘋狂急增，過萬元買一部單車，再花幾萬元改裝的大有人在。


■ Ducati Pit boss限量版太陽眼鏡$6,800


■東洋單車三腳座$1,980


■ Brooks B18-Lady特別版單車座連手柄$2,800/套


■ Cannondale F2 Lefty單叉左筒避震單車原價$13,980，呢部單車便花了五萬元改裝。

改裝配件

■ tune cannoball全世界最輕最順 Hub。$8,500/對


■ DT swiss 300g最輕輪圈。$5,500/隻

來源:蘋果日報網站